احنا والنوبيل

موضوع: احنا والنوبيل الإثنين يونيو 08, 2009 8:43 pm

احنا والنوبيل
طبعا مافيش حد فينا يقدر يتخيل حياته شكلها ممكن يكون كان عامل ازاى من 10 سنين مثلا من غير النوبايل

دلوقتى لو اى حد فينا النوبايل بتاعه (سقط شبكة) ولا (فصل شحن) ولا (ضرب سوفت وير) ولا (اشفر رصيد) ولا (فى فترة السماح) ولا (انتهت الصلاحية) ولا حد (فتح عليك) وخلصلك اخر 50 قرش فى الكارت يبقى اليوم مش باينله ملامح والنهار ماطلعلوش شمس. وده لاننا كلنا ما تقدرش تسغنى عن النوبايل ده ولو للحظة واحدة, علشان صاحبي الى مستنى منى رنة ولا صاحبتى الى مستنية منى (مشجج)

مع اننا لو رجعنا شوية بالزمن لورا هنلاقى اننا كنا عايشين حياتنا بمنتهى الطبيعية ومن غير اى مشاكل ولا ضرورة لوجود هذا (المتشال) في حياتنا من اساسه, واذا سبنا شوية الزمن دول ورجعنا وراهم كمان شوية هنلاقى ان ما كانش فى تليفون ارضى اصلاا فى البيوت , طب
احنا وقتها كنا عايشين برضه, ما احنا كنا بناخد مواعيد وبنقابل ناس وبنستناهم وكانت الناس بتقضى مصالحها وبتبلغ اخبارها وكانت حياتنا ماشية فى هدوء وسلام وسكينة و... (ريا وعدلات)

طب ايه الى جد جديد علينا ؟, ولا حاجة بقينا شعب مستهلك وعندنا نهم ورغبة فى الاحساس بالرفاهية واحنا مش لاقيين ناكل من اصله

فمنتهى التناقض ان تلاقى شعب بيستغنى عن حاجاته الاساسية علشان يثقل نفسه باعباء ثانوية ويحولها بقدرة قادر لحاجة اساسية فى حياته, فبقت رغبة اى حد فينا دلوقتى ان ياكل ويشرب ويلبس ويشحن قبل الكارت ما يخلص

انا مش ضد اننا نستخدم هذا الجهاز الرائع, بس المصيبة احنا بنستخدمه ازاى, اذا عملنا استقصاء وطلبنا من شركات النوبايل انها تسجل مكالمات العملاء اليومية لوجدنا ان اغلبها ان ماكنش كلها بتبدى بجملة (انت فين..؟) (طب انا جاى فى السكة دلوقتى) وممكن تليها بعد العبارات الاخرى الخاصة بالشخص الى ماسك النوبايل نفسه, ما هو لو كل صاحب نوبايل استنى 3 دقايق هيوصل الطرف التانى ويوفر تمن المكالمة ويجيب بتمنها ساندوتش يفطر بيه

ده غير الشركات والتجارات الى فتحت ولقت لنفسها لقمة عيش بسبب هذه الخدمة الرائعة زى نمر الرنات واللوجهات والنغمات وزاد علينا الافلام والكليبات والمششجات والاغاني .. وكله وادفع يا حسين

وما تنساش تطلب 0900 ست ستات ونزل احدث النغمات والكليبات واسمع الست واسمع العندليب ولو عايز تسمع الشيخ عبد الباسط عبد الصمد ما يضرش برضة وكله بتمنه وادفع يا حسين

ده غير كل محلات الأجهزة الكهربائية فى شارع عبد العزيز الى فى يوم وليلة بقت كلها بتبيع (عدد) النوبيلات والوشوش الملونة والشرايط والزراير والدلايات وكله ادفع يا حسين

ومحلات الي وقف فيها شخص محترف مخصوص علشان ينزلك النغمات الى انت بتحبها على نوبايلك ويدلعهولك ويهشكهولك وكله وادفع يا حسين

وزاد علينا برامج التليفزيون والمسابقات الى كل ما تصوت من نوبايلك اكتر كل ما فرصتك فى الفوز تكتر وكله ادفع يا حسين

ارباح شركات المحمول الخيالية من رسائل المششجات الى مالية الفضائيات الى نلاقي شريط بيجرى ومليان كلام عبيط ماركة انا الفارس الوسيم من بورسعيد وعايز اتعرف على بنت بورسعيدية حلوة وامورة وكميلة ودمها خفيف ومتدينة وادفع يا حسين

اختذلنا كل اهتمامتنا فى موديل (العدة) الى انا شايلها ولونها وفيها كاميرا وفيها راديو والعاب و mp3ولا لأ, وطلبة الجامعات الى اصبحوا ضالعين (جمع ضلع - اخو لوح) فى احدث الماركات والكاميرات واللوجهات والرنات

بس برضة ما عرفناش, لو رجعنا 10 سنين لورا كان حالنا من غير النوبايل شكله ايه؟

اكيد كان هيبقى افضل, على الاقل كنا وفرنا فلوس وسيولة تمن الكروت والفواتير بتاعة المكالمات والرنات الى مالهاش لازمة .. كانت اتوجهت اهتمامتنا لصناعات ومجالات بيع وشراء اقيم, كنا لبينا احتياجتنا وما كناش حسينا بالعجز والهم مع طلعة كل اول كارت او فاتورة

كنا ارتحنا من مشاكل من نوع انت فين انا رنيت عليك و(كانسلت) عليا, ولا بعتلك مششج وانت ما ردتيش

كنا خلصنا من رنة (رجب حوش صاحبك عني) الى ممكن ترن وتلعلع فى صلاة جمعة من موبايل بنى ادم محترم

اكيد كنا هنخلص من العقد النفسية والنقص بتاع واحد شايل عدة جديدة والتانى شايل عدة قديمة وبيستخدمها وهو مخبيها فى كم قميصه علشان بقت حاجة تكسف, او تقييمنا للشخص اذا كان بيه ولا سواق ميكروباص من نوع العدة الى هو ماسكها فى ايده

يا تري بعد ده كله لو رجعنا 10 سنين لورا هنقدر نعيش من غير النوبايل ؟

طب بلاش من 10 سنين, لو رجعنا 5 سنين بس لورا ممكن تشيل عدة نوكيا بنانا ابو اريال ؟؟؟؟؟

مشكوررررررررررررة على الموضوع

ثااااااااااااانكس ع المرور والرد

احنا والنوبيل

احنا والنوبيل

نبذه تعريفيه

التبادل النصى

التبادل النصى

التبادل النصى